真上級燒肉放題

大家好努力留言推我去邊食飯，但我想講俾你哋知，俾你估到就唔係我嗱！每逢八月我都特別精神。。。。病發作嘅！老老實實係香港食壽司郎係虐待，排到變化石。係日本食壽司郎都係虐待，因為唔好食，去都去hama嗱。我會去壽司郎只因食炸雞only。吉野家香港不了，日本還可以，不過自佢日本改革後我覺味重咗，所以好少食。大星星咖哩就真係窮人恩物，好食夾大件，仲有得添菜，但食完口渴嫁！石原BB就直頭係催眠，晚晚海量廣告，不同你講牛！饅魚！牛！饅魚！牛加饅魚，睇住佢個靚樣都飽哂，所以都唔去。咁係咪又七仔？定返屋企食杯麵？今次就去咗。。。。。。。一餐當三餐嘅放題～肉屋橫丁。 我唔係一個好愛勁多肉嘅人，燒肉好少食放題，因為我總覺得放題嘅燒肉唔夠我食開啲咁正，價錢都係其次，食咗唔好食嘅嘢係浪費我胃部空間同時間。肉屋橫丁位於宅男天堂秋葉原，乜老秋都有好嘢食？講真唔多，但唔好睇少呢間肉屋橫丁，佢真身係淺草燒肉名店平成苑旗下。平成苑淺草係總店，佢銀座店亦係日本出名嘅名店。秋葉原呢間主打放題，俾年青人去，價錢當然無主店咁勁，但質素絕對無偷工減料。佢用嘅和牛真心好好好高質素。佢有個肉櫃，放了十多款不同牛，不同部位，不同級數，要牛就自己攞個牌出去講號碼，幾多件就執俾你。但其中有幾款係最上品就每次只能攞一兩塊，食完先可再攞。我今次去牛肉加不同部份都佔了近20款，點食得哂，所以只主打佢特選限定嘅最高級品。 燒肉好唔好，八成以上就係肉本身質素。佢嘅肉質素真係高，雖然佢用咗要你排隊每次攞去消耗你食嘅時間，但如非繁忙時間或你有兩個人接力食同攞其實無問題。大約¥6000一個人真係值，食肉獸，食高級肉獸就真係超值。我諗如果我今次食嘅量去返銀座平城苑食，應¥15000都可能落唔到樓啊！有機會大之後去試下。