top of page

夢!只可追?

夢!只可追?


2020年3月8日,坐上日本封關前最後一班機到東京,為的是一星期後推出的日本限定陀螺。當時都有其他行家係東京。到3月下旬香港政府放飛會封關,佢哋都同我講不如一齊返香港,遲下唔知返唔返到,日本危險過香港啊。我嘅想法係香港真係封,咁返到香港仲有乜可做?無!咁不如留係我最愛嘅城市睇下世界會變成點。由寫下Facebook俾大家知到日本變成點,到開始幫大家買嘢去解思鄉之苦。我嘅簽證係“短期滯在”即遊客,得90日。到六月頭因為回港航班全取消,所以好簡單就批了90日延期俾我。呢段期間你哋買嘅嘢越來越多,我一介紹就爆買,八月生日時就買了www.jponline.store呢個網址俾自己做生日禮物,打算設立online store。正正遇上中秋同東京站大翻新後出現萩之調煌,結果三日賣了400幾盒。到9月13日 online store正式試業,第一樣賣嘅係Sou Sou mask case。當時回港航班仲未恢復,九月尾好簡單就再延期90日到12月。之後無論個人代購同online訂單都有增無減。年尾時回港航班開始開通,已經知道想再續期已經唔易,所以去了尋求律師專業意見,結果得到好多人嘅擔保同支持,再得到90日延期到三月。過中嘅中國新年直頭恐怖,買到有品牌要將東京其他分店全收回俾哂我都唔夠。係一月到三月呢段期間一共搵了四個律師諗未來要點。有日本人,台灣人,香港人嘅在日律師,仲有在香港嘅律師,大家都建議我設立日本公司再申請停留日本。好多朋友都係咁講,但其實講就易,經律師解釋哂後根本係另一件事。當一個律師呃我,都唔會四個都呃我一樣嘅嘢掛。


外國人在日本一般簽證有“短期滯在”即遊客90日,學生簽證即讀書期間,商務簽證即有日本公司幫你申請最多180日,在職簽證即有日本公司請你期間,特別活動簽證通常係讀完書或辭職後俾時間你安排離開或搵工就最多180日,仲有經營管理簽證,即係日本投資開公司做老闆,你生意成功可永不停續同申請永住。好多人或YouTuber都介紹點開公司申請經營管理簽證留日,但好多好多都係講啲唔講啲,真係咁易?直到2020年尾,全日本成功持有經營管理簽證嘅外國人唔夠28000人,中國人佔了近15000人。全球咁多人先得28000人咋,點解?因為好多人同你講有日本公司又點?日本政府同樣係唔批經營管理簽證俾你,因為經營管理簽證等同得到大半個日本居留權。先講外國人想開日本公司嘅問題,日本法例外國人一般不能於日本開設銀行同電話,係嚴格監管。外國人想開日本公司先要有一個日本人為你代行,最少500萬日元資本要交俾佢,佢申請成立公司,成功後將股份轉返你名。但日本人唔會隨便幫你,因有可能影響佢正職合約或佢日後公司福利同稅務。如果無業人士就最簡單或有啲公司會一手幫你包辦,但我係日本見過幾位香港人,佢哋都遇上開公司易,到轉回自己名就真面目盡現,殺你一勁血。就算錢事少,你大把無所謂,但擁有了日本公司就要提交生意計劃書,個人背景,生意經驗等俾日本政府審批。如果你本身無生意經驗,無日本貨源做開,無日本公司reference,生意無可持續性,咁一半成功機會都無,但記住幫你申請嘅公司係要照收錢。點解咁多中國人成功?因為佢哋做最安全但貴同搵唔到乜錢嘅生意,就係加盟便利店。而開公司到好運好順利開到並一次成功申請攞埋經營管理簽證可以6個月內完成你已經係好叻叻。但對我嚟講仲有一個問題,就係外國人係日本開公司需要有自身所屬國家政府部門所發出的個人簽署證明,香港人就要去民政事務署申請,提交俾日本政府證明呢個簽名就係你本人有法律效力。咁我現係日本點申請到?另外我係香港人,經營管理簽證應要經日本駐香港領事館申請,我係日本喎,點申請?仲有日本駐香港領事館現已停辦所有簽證喎,點申請?所以全部律師嘅建議係我應先返香港從頭申請,準備好後等開關再回日本。仲有就係我現手持遊客簽證,一般入國局係唔會將簽證性質中途改變,要離開日本後再嚟過。結論係我應無可能再留日本,要回香港。

成件事有一班在日嘅香港大學生知道,結果佢哋好大膽用咗佢哋方法陪我去入國局爭取到再90日簽證到六月,真係好例外,已經好開心,亦預咗六月點都要回港。多謝好多人知道我仲想係日本追夢,幫我諗唔同方法,特別係香港同事搞盡腦汁,一班H袋朋友出盡人力物力,係六月初經日本政府介紹下遇上一位律師(行政書仕)。一方面佢用特別理由成功為我延長簽證到九月尾,另一方面佢了解哂呢年我係日本做過乜,生意嘅所有數據,驚人嘅用錢記錄同人事關係,將我所有寫了一份好詳細嘅報告同計劃書直接交咗俾東京都廳,小池百合子直屬部門。七月尾提交,八月中透過律師收到回覆想了解過中一啲問題。直到我八月生日前兩日,律師樓收到小池白合子以東京都廳發出的回信,內容就係我作為遊客唔可能再申請延期,已經共18個月了,入国局係不可能再簽。但作為東京都廳知事,佢希望我可以停留係東京發展我嘅業務,故此賦予我一個特許於日本在留,簽證為經營管理簽證。隨後資料會交入國局,安排我直接取得“在留卡”獲得日本市民權利,亦要接受日本人義務。我諗呢份生日禮物係我一生收過最大最驚喜。律師向我解釋係即我跳過了所有程序,一跳就直接得到經營管理簽證,只要我一路係日本做生意,如生意好成功就三四年,只要唔執,老實交足稅,就算平平無奇十年內好大機可得到永住。而且我將直接就得到在留卡,唔係再揸passport,我已同一般日本人咁可以直接擁有銀行户口,電話,租屋,開公司唔洗靠人。我唔知我係咪先例,但香港人中我應係首例。將所有程序完全顛覆,就係不停努力,同我身邊好多人幫助嘅成果。





我現正式宣佈,預計日本通將於2021內成立日本會社,會以日本為總部,香港將會係海外分部。格子園會正式交由香港同事,佢已佔格子園一半股份,佢都係老闆並有權決策格子園所有,嗰啲上嚟無禮貌仲話要見你老闆乜乜乜嘅“人”,唔洗再扮勁,佢就企係你面前。未來 jponline.store 會擴展更多範疇,亦會積極尋求同日本不同公司合作,每論日本開關與否,都會將日本更精彩一面帶俾大家。呢個夢係大家帶俾我,但呢個夢先啱啱正式開始,我會更努力做得更好。

昨日我已正式簽紙接受東京都廳邀請並影相準備發出在留卡,我出發前諗咗好耐應用邊枝筆。仲有唔好信人話係日本買樓可以申請居留權,早就唔可以嫁嗱。大家係咪覺得好神奇啊?係咪好睇過真人show呢!


香港人加油!香港人無論係邊處一樣係咁勁嫁!




835 次查看1 則留言

最新文章

查看全部

收爐

bottom of page