top of page

世紀誤會?


日本電視台數目之多記都記唔哂,唔同県又有唔同,始終日本地大,可以容納好大營商空間,同香港好唔同。以前去日本會長開酒店電視,為的係睇不同CM(廣告)同Smap x Smap。過去呢一年日本生活讓我體會到日本電視節目真係好豐富,好資訊性,好精彩。呢年有個習慣就係多人嘅日子都唔出街,唔去買貨,最多酒店附近食一餐就回。係酒店執貨pack貨,上網做功課,改website都忙爆,陪住我就係房內電視機。日本人做事係會守住佢嘅法則去做,零售係咁,營運電視台都係咁,每個節目有佢嘅模式,但從不馬虎,功課做足,仲會配合好唔同時節,環境做好有關專輯,就算係指責政府嘅節目一樣可以製作,唔會做完成team人唔見咗。好多節目嘅影響力好大,例如上個月有節目介紹完池袋西武係東京都美食天堂第一位,仲特別介紹Tulip Rose新品,結果過去一個月池袋嘅Tulip Rose日日排到唔見龍尾,係講緊排兩三層樓,幾勁!


有時我都分唔到係電視台搵資料定係產品商買時段去做專輯,但好睇有用先係觀眾關注。天氣開始回暖,春天回來了。日本出名多蚊,回暖啲蚊就開始出現,連我酒店房都有,無孔不入。上兩個星期就有個節目介紹一間好出名生產防虫用品嘅公司“earth"。我細細個就諗點可以捉到咁多曱甴,烏蠅,蚊去做實驗,呢個節目就幫我解開咗多年疑問。呢間公司總品有一間嚴謹密封嘅房,入面有一個工作好多年嘅女仕,佢就係負責養曱甴,烏蠅,蚊等等你我可能見都未見過嘅害虫。數量之多係以十萬計,全部好整齊一箱箱排滿整間房,每日餵佢哋要用全日時間,睇到都有啲驚。佢依家有個助手,兩個勁到真係乜蛇虫鼠蟻都唔驚先恐怖。跟住就介紹其中一個靈魂人物,一名女化學家,佢就係其中一個研發同調配出不同防虫產品嘅主腦。節目講佢就係研發緊最新驅蚊產品。研發過程最精彩係實測,佢將自己隻手伸入一個有幾十隻蚊嘅箱內一分鐘,計住會俾蚊襲擊幾多次,再將手揸上新調配嘅防蚊cream放入個箱一分鐘,結果係十幾次同零嘅結果,真係藝高人膽大!原來呢個只係前戲,好戲在後頭。佢新研發一隻驅蚊噴霧,又要做測試,今次點玩?佢攞住一個載有數百隻蚊嘅膠筒,行入一個玻璃密室。先輕輕噴了兩吓新噴霧,半分鐘後打開個膠筒放哂啲蚊出嚟同佢同處一室,你話驚唔驚?結果係個化學家不單全無被針,2分30秒後遍地屍骸,全部蚊倒地。原來呢個噴霧係會稀釋於空氣再黏附係周邊物品,只要蚊一吸入就會癱瘓佢嘅神經系統而倒地,噴一次有效成日達致防蚊效果。實驗後女化學家話效果唔理想,因為兩2分半鐘太耐了 ,應要更快。更指出佢哋係會針對不同害虫而推出不同嘅產品。






有趣係香港人一路稱為捉蚊啫喱嘅產品其實並唔係用嚟捉蚊而發明,啫喱嘅成份係為吸引烏蠅而調配,主要目的係為“捉烏蠅”。今年新成份有效三倍,包裝更清楚印上烏蠅嘅樣,更重要係佢官網已清楚以害虫圖案去分類產品,自己上去㩒下“蚊”嗰圖案所列出產品有無呢個啫喱吧!

www.earth.jp/pest-control/index.html


好多人早問我今年仲有無做呢個啫喱,我都回覆留意fb。現在清楚指出呢個啫喱捉唔到蚊咁我仲賣俾你哋?當日NHK個節目完結有列出嗚謝earth呢間公司,當然好可能係earth支持下拍,而呢個節目出街後一系列新版驅蚊噴霧和掛牌就推出市場,你話係咪計算好呢!


我唔知香港蚊會否唔同會俾呢個烏蠅啫喱引到,都確實講明係引烏蠅用,你要捉烏蠅就當然要買,但如要捉蚊就自己諗下。歡迎大家分享過往用過情況!而earth公司一系列新驅蚊產品好多係壓縮氣體或一類藥品成份,所以係唔可以運回港俾大家,對不起!






351 次查看0 則留言

最新文章

查看全部

Comments


bottom of page